يا شوق منّك صهدتي و اوجاعي ** ليلك زمان في خاطري تدّاعى
لمتين و انت في كيتي و الياعي ** ذوّبت قلبي والضمير متاعـه
كرهت الصّبر و حالتي و اوضاعي ** لوقتاش صابر فديني بنفاعه
شيّبت راسي و السّنين متاعي ** و قريب نمشي جهامتي ع القاعه
تحمّلت يزّي لا تخيب اطباعي ** واغفل عليه القلب حتّى ساعه
والحق على من خلّفك تباعـي ** تلقاش طبعي ف مثيل اطباعه
مازال فاهم ليعتي و الدّاعـي ** ولا نسي كيفاش بكري اوضاعه
يا شوق ما تبقاش هاك الواعي ** ملّي رحل مد الضمير و باعه
حبيبي النساني ما يجيش رداعي ** بطّال تبقى شواهدي دمّاعه
فدّيــت م التّكتيف حل اذراعي ** ماتقولشي المكتوب قاصر باعه
عاهد حبيبي لقيت فيه خداعي ** يوم ال خمسني مد ليّ صباعـه
يا شوق ماتفتيش كف امناعي ** ارياح المحبه صايبتها مجاعه
يا حصرتي من كان يذري شراعـي ** و كانت امواج بحورنا فيّاعه
جف البحر و خاطري ومدماعي ** والحب ما تبقاش فيق اتواعى
و لاّ سراب نقّال دون انفاعي ** الكذب متعه و الحيل خلاعه
يا شوق يزّي ما تقصّر باعي ** ما عاد عندي بالحبيب ولاعه
باللّه اعذر قصيدتي و ابداعي ** المقصود واضح والمعاني شباعه
كمال شاعر يا شواقي راعي ** الحب نايا مراكبه و شراعه
من ايّام بكري مصيفنا وخلاعي ** مع لجازيه و فطّوم اهل الطّاعه
واليوم كان الهم بين اظلاعي ** و خوفي الزّمان يعود مالطّمّاعه
الخميس فبراير 27, 2014 10:31 am من طرف بكر كتانة
